Raja Silahisabungan

-1-
Andorang so pinabotohon songon dia hahomion ni Raja Bungabunga Silalahi, jumolo pinatolhas tona ni Raja Bungabunga tu sorangan na ” Asa rap ma hita saluhutna pinompar ni Raja Bungabunga paturehon diangka na hurang lobi ”
Sabungan ni hata, Sabungan ni harajaon, Sabungan ni parbinotoan dohot parale-aleon do Raja Silahisabungan pahompu hasian ni Raja Silahisabungan do Raja bungabunga, tu Raja Bungabunga do di memehon Raja Silahisabungan parbinotoan dohot hasaktionna.
Tubu di Balige do Raja Silahisabungan, Balige do Huta Sabungan Harajaon Batak na digomgoman ni natorasna Raja Natarbarita Tuan Sorba Dibanua, ualu anak ni Tuan Sorba Dibanua sian na dua ina, ima Ompung Boru Nai Anting Malela Boru Pasaribu dohot Ompung Boru si Baso Paet.


-2-
Lima tubu di Ompunq Boru Nai Anting Malela Boru Pasaribu :
1. Si Bagot Ni Pohan – Siangkangan
2. Si Paet Tua – Paidua
3. SiLahisabungan – Paitolu
4. Si Raja Oloan – Paiopat
5. Si Raja Hutalima – Pailima

Tolu tubu ni ompung boru Si Baso Paet :

1. Sobu
2. Sumba
3. Toga Naipospos

Di laon-laon ni ari, songon ni dokkon ni Si Bayo Datu Bolon ni Harajaon, asa gabe partaonon jala hot harajaon ni Tuan Sorba Dibanua, satahi saoloan ma nasida laho patupahon horja bolon. Dibagi ma turgas-turgas na hombar tu ulaon i, Si Paet Tua, Silahisabunga dohot si Raja Oloan ma na marturgas mangalap borotan ni horbo sitingko tanduk, sijambe ihur, pangarege di pogu ni alaman, pamostang pangambe di pargaduan. Ditontuhon do hau sialapon ni nasida, ima hau sarimarnaek, junjung dolok, hau pinta – pinta, hau bane – bane, parhau na limut-limuton, paranggun-anggunan ni homang di tombak libo-libo.
Anggo jolma biasa do namagalului tung naso tupa do dapot hau i, hape dapot nasida do hau i. Dung sahat nasida di huta mamorsan hau borotan i nunga sae ulaon mangalagat horbo songon na ni dokkoni si Bayo Datu Bolon ni harajaon i, muruk situtu ma nasida natolu, satolop ma nasida natolu naso jadi marsiantoan di adat dohot di uhum tu si Bagotnipohan, Timus ni Api ni hahana ipe naso jadi idaon nasida.



-3-
Borhat ma nasida na tolu sian Balige, jumolo ma di pataru si Paet Tua tu habinsaran ima Laguboti, sian habinsaran lahoma nasida nadua tu si Ogung-ogung di sabola habinsaran ni Pusuk Buhit, leleng do Raja Silahisabungan mandongani si Raja Oloan di luat i, alai dung sonang rohani si Raja Oloan tinggal di luat i, laho ma Raja Silahisabungan mangalului luat baen parhutaan na, gabe sahat ma ibana di Dolok Hole jala marhuta di Huta Lahi.
Di na laho borhat Raja Silahisabungan tung mansai lungun do roha ni si Raja Oloan, di rohana naeng ma rap nasida marhuta di luat i, hape Raja Silahisabungan ingkon laho do mangalului luat parhutaan na, ai nunga rap marnipi Raja Silahisabungan dohot si Raja Oloan, rap mambege nasida di nipi na be, hata na mandokkon ” Ahu mamarentahon tu hamu nadua asa gabe tano on ma gabe tano ni si Raja Oloan dohot
Pinomparna, sian pinomparna do muse tubu Raja Bolon, ia ho Raja Silahisabungan lehononku do tuho tano nadi sabola Pastina”. Alani i marpadan ma Raja Silahisabungan dohot Raja Oloan :Naso jadi paboaon nasida parhutaan na tu Sibagotnipohan dohot pinomparna, molo adong na masa di nasida di bahenma timus ni api pabotohon asa ro mangurupi.Tonahonon ma tu pinompar tabe asa sisada anak sisada boru pomparan nasida muse di pudian ni ari.


-4-
Dung marhuta Raja Silahisabungan di Huta Lahi, dialap ma Oppung boru Pinggan Matio Boru Padang Batangari. Ualu ma tubu ni Oppung Boru Pinggan Matio Boru Padang Batangari ima na margoar :
1. Laho Raja / Ranim Boni Boru Padang Batangari
2. Tungkir Raja / Pinggan Haomasan Boru Situmorang
3. Sondi Raja / Siboru Nagok Boru Siboro
4. Butar Raja / Lagumora Boru Sagala
5. Dabariba Raja / Sahat Uli Boru Sagala
6. Debang Raja / Si Boru Panamean Boru Sagala
7 Batu Raja / Bunga Pandan Boru Sinaga
8. Deangnamora ( Boru sasada ni Raja Silahisabungan )
Sian Huta Lahi laho do Raja Silahisabungan manandakkon hadatuon tu si Bisa, ujui dibagasan parsahiton do boru ni Nairasaon ima na di goari Boru Milingiling ( Boru hasian ), ala dang adong na boi mangubati satolop ma Nairasaon dohot Raja Silahisabungan, molo boi di pamalum Raja Silahisabungan sahit ni Boru Milingiling aha pe dipangido upana ingkon lehonon ni Nairasaon.



-5-
Malum do di daoni Raja Silahisabunga sahit ni Boru Milingiling, dung malum di pangido Raja Silahisabungan ma ia upana ingkon na diubatan nai gabe parsonduk bolon na, hape andorang so marsahit Boru Milingiling nunga di paorohon, alai nunga parjanjian manang aha dipangido ingkon leanon na, di oloi Nairasaon ma pangidoan ni Raja Silahisabungan i, alani I muruk situtu ma paranak tu Nairasaon dohot tu Raja Silahisabungan. Asa unang marsitorus be parbadaani, dung sorang sahalak poso-poso ( si Bursok ) pintor dibahen Raja Silahisabungan ma si Bursok i tu hajutna jala diboan mulak tu Huta Lahi, alai Boru Milingiling (Boru Nairasaon) tinggal do di si Bisa .
Dung sahat Raja Silahisabungn ni Huta Lahi mabiar do Raja Silahisabungan paridahontu Oppung Boru Pinggan Matio Boru Padang Batangari si Bursok na di bagasan hajut na i, dibahen ma si Bursok di bagasan sopo-sopo jala marbunibuni ma Raja Silahisabungan mamboan purik dohot
Indahan tu sopo i laho marmeme si Bursok natinabunihon na i, hape sian naso pamotoan ni Raja Silahisabungan roma Oppung Boru Pinggan Matio Boru Padang Batangari mandapothon Raja Silahisabungan. Dung di sukkun Oppung Boru Pinggan Matio Boru Padang Batangari aha na di hajut nai gabe di patorang jala di pasahat RajaSilahisabungan ma poso-poso i tu Oppung Boru Pinggan Matio Boru Padang Batangari, dijakkon Oppung Boru Pinggan Matio Boru Padang Batangari ma poso-poso i jala di bahen ma goarna si Tambun.



-6-
Tingki i nunga matua Oppung Boru Pinggan Matio Boru Padang Batangari, alai martonggo ma Raja Silahisabungan tu Mula Jadi Na Bolon gabe maraek ma tarus ni Oppung Boru Pinggan Matio Boru Padang Batangari, di patarus Oppung Boru Pinggan Matio Boru Padang Batangari ma Tambun Raja, dang hahurangan Tambun Raja ai tupa do tarus di Oppung Boru Pinggan Matio Boru Padang Batangari pagodang-godangkon Tambun Raja.
Ala nunga marsiajar doli-doli Tambun Raja, di pangido Tambun Raja ma tu Raja Silahisabungan asa diloas ibana laho manopot natumubuhon ibana ima Oppung Boru Milingiling di si Bisa. Dang tarjua Raja Silahisabungan pangidoan ni Tambun Raja, alai andorang so borhat Tambun Raja maninggaihon Huta Lahi, dibahen Raja Silahisabungan do Poda Sagu Sagu Marlangan.



-7-
Dibahen ma Sagu-sagu na marlangan (Pucat) rupana gana jolma, balgana sabalga ni dakdanak na siat hundul di ampang. Dung di peakkon di jolo ni Raja Silahisabungan Sagu-sagu marlangan na di pahundul di bagasan ampang jala hundul marsila sude anakkon ni Raja Silahisabungan manghaliangi Sagu-sagu marlangan, Tambun Raja marsiadopan dohot Raja Silahisabungan Loho Raja, Sondi Raja, Dabariba Raja, dohot Batu Raja hundul di siamun ni Raja Silahisabungan oppung Boru Padang Batangari, Namboru Deangnamora, Tungkir Raja, Butar Raja, Debang Raja hundul disabola Hambirang ni Raja Silahisabungan, ninna Raja Silahisabungan ma tu nasida ” Onma naso boi oseonmu manang pinomparmu ” :
Ingkon marsihaholongan hamu sahat rodi pomparan muna muse.Naso tupa dohonon muna naso saama saina hamu napitu dohot Tambun Raja, jala ingkon sisada lulu boru do hamu.Jala hamu napitu dohot angka pinomparmu ingkon humolong rohamu di boru ni anggi muna Tambun Raja on rodi pinompar muna, jala hope Tambun Raja dohot sandok pomparan mu ingkon tong songoni maradophon boru ni angka haham napitu sahat tu pinomparmu.Naso jadi marsiolian pomparan muna. Naso jadi olion ni pomparan mu napitu pomparan ni anggimu si Tambun
Raja on, jala naso jadi olion ni pomparan ni Tambun Raja pomparan ni sude haham napitu on.Naso tupa pungkaon muna bada manang salisi.Molo adong parbadaan di hamu napitu sahat rodi pomparan muna, sandok ingkon anggi muna manang pinomparna si bahen dame dihamu, jala uhum na tingkos naso boi mardingkan jala ingkon oloan muna jala naso jadi juaon, jala las songoni dohot



-8-
ho Tambun Raja, ia adong parbadaan di pomparan mu sandok ingkon sian pomparan ni haham napitu on ma si bahen dame jala si dabu uhum na tingkos, jalo naso tupa mardingkan jala naso jadi juaon.Jala molo adong parbadaan di hamu naso tupa halak na asing laho pasaehon.Sitonahononm una be ma i tu pinompar muna, jala manang ise na mangose padan on sandok songon Sagu-sagu marlangan on ma ibana peak so maranak so marboru.
Dung di patupa Raja SiLiahisabungan Poda Sagu-sagu marlangan, di pataru Raja Silahisabungan ma Tambun Raja manopot dainang pangintubuna tu si Bisa, alai Raja Silahisabungan ndang sahat tu huta, dung di patudu Raja Silahisabungan huta i tu Tambun Raja pintor mulak do Raja
Silahisabungan ai di tingki borhat mamboan Tambun Raja tu Huta Lahi marjanji do Raja Silahisabungan naso jadi ibana mulak tu huta i, laho ma Tambun Raja tu huta i jala pajumpang ma Tambun Raja dohot Boru Milingiling Boru Nairasaon. Ndang mulak be Tambun Raja tu Huta Lahi, dialap ma boru ni tulang na ima boru Manurung (boru ni Raja Mangarerak), laos marhuta ma Tambun Raja dohot pinompar na di Huta Sihombu.
Dung Sabintang Tambun Raja di pataru Raja Silahisabungan tu si Bisa, ro ma suruan ni Tuan Sihubil tu Huta Lahi mangalapi jala mangelek asa olo Raja Silahisabungan dohot tu Balige, ala Raja Silahisabungan ndang Mangeloi diluahon ma tolu pahompu ni Raja Silahisabungan sian parmahanan.



-9-
Ala namboru Deangnamora do napaboahon tu utusan ni Tuan Sihubil na pahompu ni Raja Silahisabungan do parmahan natolui, di muruki Raja Silahisabungan ma namboru Deangnamora, sumolsolbagima namboru Deangnamora, ndang olo be namboru Deangnamora mulak tu jabu, sai di partonunan na i ma namboru Deangnamora paimahon tudia pe ibana saidiboanma ules ni Raja Bungabunga nabaru sae ditonun Deangnamora hape Raja Bungabunga ndang mulak betu Hutalahi, jala Raja Silahisabungan pe gabe sai marsahit-sahait ala arsak ni rohana.
Tading maetek do Raja Bungabunga, iima ma anakkon ni Sondi Raja tubu ni Oppung Boru Nagok Boru Siboro, dua boru tolu anak, ima : 1. Raja Bungabunga, 2. Rumabolon, 3. Rumasingap, ia boru nadua i sada marhamulian tu marga Sinaga, sada nai ndang marhamulian ai dung di boan Raja
Bungabunga tu Balige manongnong do ibana tu tao ima na di nauli basa dohot angka sahala ni namboru na marhasaktian.
Tingki marsiajar doli-doli marmahan horbo do Raja Bungabunga jonok tu partonunan ni namboru Deangnamora, ala masa ari logo jala ndang adong be na boi tubu manang aha di suand di Balige, mangulpukma Datu Bolon jala didokkon ma naingkon patupaon pesta bolon lao mangelek Raja Silahisabungan. Laho patupahon ulaon pesta bolon i, di paborhat Tuan Sihubil ma suruan na mangelek Raja Silahisabungan asa olo ro tu Balige mangadopi pesta nanaeng patupaon ni Tuan Sihubil di Balige, alai dung dipasahat nasida tona ni Tuan Sihubil tu Raja Silahisabungan jala dipatorang songon dia na masa di Balige, Raja Silahisabungan ndang olo dohot tu Balige atik pe nunga sian nasa gogo nasida mangelek Raja Silahisabungan. Alani i marsak ma nasida, mulak marsolu huhut mangandun-gandung.



-10-
Dung jonok utusan ni Tuan Sihubil tu partonunan ni Namboru Deangnamora, dibereng nasida ma Namboru Deangnamora, dohot tolu halak parmahan na jonok tu partonunan ni Namboru Deangnamor ima : 1. Raja Bungabunga anak ni Sondi Raja, 2. Sihaloho anak ni Loho Raja, 3. Sigiro anak ni Batu Raja.
Tumatangis ma nasida mandapothon namboru Deangnamora, gabe asi situtu ma roha ni namboru Deangnamora mamereng nasida, ala asi ni rohana dipaboa ma na pahompu ni Raja Silahisabungan do parmahan na tolu i. Dungi di dapothon nasida ma parmahan na tolu i, di elek-elek gabe olo di boan marsolu marputor-putor di tao i, hape dilalap-lalapi na sida ma parmahan na tolu i asa boi diboan lam dao sian Huta Lahi, Ala nunga dao sian Huta Lahi, marsungkun ma parmahan i lao tudia ma nasida boanon na, alai ndang di alusi, mabiar jala marsigogo ma parmahan na tolu i mamaksa asa mulak tu Huta Lahi, alai ndang dioloi ai ingkon boanon na do nasida tu Balige.
Asa hatop sahat tu Balige mamotong dalan ma nasida sian tano ponggol, tingki i ndang dope boi tano ponggol di laosi solu, mijur ma nasida sian solu i, jala di hallung ma solu I mangalaosi tano ponggol, mangaronta ma parmahan na tolu i, Sihaloho dohot Sigiro boi malua jala lintom ma nasida di luat i, alai Raja Bungabunga ndang boi ibana paluahon dirina, jala diboan do ibana sahat tu Balige.



-11-
Dung sahat di Lumban Binanga Tara Bunga Balige, dipabotohon ma tu Tuan Sihubil, ro ma Tuan Sihubil manomu RaJa Bungabunga tu Lumban Binanga Tarabunga Balige, dibahen ma Raja Bungabunga marpahean, gabe tu dos ma ibana tu Raja Bolon na togos, na bisuk jala na tongam, di arak ma Raja Bungabunga dohot gondang mardalan mulai sian Lumban Binanga Tarab unga Balige sahat tu inganan pesta Bolon na naung pinarade ni Tuan Sihubil di Lumban Gorat Balige.
Atik pe Raja Silahisabungan ndang olo dohot tu Balige, ala apala pahompu hasian ni Raja Silahisabunga do Raja Bungabunga, tong do dipatupau ulaon i, ai holan marhobas mangarak Raja Bungabunga dope nunga ro udan. Mulai sian I maradi ma ari logo naung lobi tolu taon, tubu ma suan-suanan, denggan partaonan, marlas ni roha ma Tuan Sihubil dohot sasude natorop na adong diluat i, ai dung ro Raja Bungabunga gabena niula, jala sinur na pinahan nasida.
Mamereng haburjuon dohot habisukon ni Raja Bungabunga, lam tamba holong situtu ma roha ni Tuan Sihubil tu Raja Bungabunga, ndang dipaloas be ibana mulak tu huta ni ompung na Huta Lahi, gabe anak haholongan ni Tuan Sihubil ma ibana jala dung tubu anak ini Tuan Sihubil ima Tampuk Nabolon dipangolihon Tuan Sihubil ma Raja Bungabunga tu tinodo ni Tuan Sihubil ima Ompung boru Antar Mangatu Boru Pasaribu apala Maen ni Tuan Sihubil. Dung dipangolihon dileon Tuan Sihubil ma panjaean ni Raja Bungabunga ima Hinalang dohot na Humaliangna.



-12-
la Anakkonni Raja Bungabunga tubu ni Ompung boru Antar Mangatur Boru Pasaribu 4 (Opat) anak dohot 1 (sada) boru ima namarhamulian tu Panajitan, asa unang lupa tu pomparan ni Raja Silahisabungan na maringanan di Huta Lahi, tarlumobi di haha angina na malua di tano ponggol, dibahen ma anak na margoar :
1. Sihaloho —- Pinta Harungguan Boru Pasaribu ;
2. Sinagiro —- Pinta Omas Boru Siregar ;
3. Sinabang —- Pinta Omas Boru Pasaribu ;
4. Sinabutar —- Pinta Omas Boru Manurung ;
Nabisuk jala naburju do Raja Bungabunga, pahompu hasian ni Raja Silahisabungan do Raja Bungabunga, tu ibana do dimemehon Raja Silahisabungan hasaktian dohot habisukon na, ndang Raja Silahisabungan na mangalehon hasaktian na tu Raja Sisingamangaraja, alai Raja Bungabunga do na mangalehon hasaktion na dijalo sian ompung na Silahisabungan tu dongan na Sisingamangaraja Papituhon.
Andorang so diboan Raja Bungabunga tu Balige, dilehon Raja Silahisabungan oo hohosna tu Raja Bungabunga. Dung dilehon Tuan Sihubil Tano Hinalang panjaeanna, tong-tong do ibana marhuta di Lumban Gorat alai marmahan horbona di Sibudiala, didolok ido ibana jotjot mangandungi dohot martonggo tu Mulajadi Nabolon.



-13-
Ala pardonganon dilehon Raja Bungabunga ma hasaktionna tu Sisingamangaraja Papituhon, laho ma nasida manandakkon hadatuon tu Dairi, Sidikalang sahat tu uluon. Dung sahat di si Bisa pajumpang ma Raja Bungabunga dohot Tambunan, ala las ni rohana boi pajumpang dohot Tambunan pomparan ni ompung na Raja Silahisabungan, gabe marsirang ma Raja Bungabunga dohot Raja Sisingamangaraja Papituhon, mulak ma Raja Bungabunga tu Lumban Gorat pabotohon tu Ompung boru Antar Mangatur Boru Pasaribu, dung mardos ni roha Raja Bungabunga dohot Oppung boru Antar Mangatur Boru Pasaribu, diboan Raja Bungabunga ma Tambunan Sian Si Bisa tu Lumban Gorat jala dibahen ma Marhuta di Tambunan, dungi asa lam gomos partondongon na tu Manurung disuru Raja Bungabunga ma anakna Siampudan ima Sinabutar mangoli Pinta Omas Boru Manurung.
Di uman pahompuna do parhuta sadaon ni Raja Bungabunga, sada sian pahompu ni Raja Bungabunga ima anak buha baju ni Sihaloho laho do marhuta sada tu Pangururan Samosir, dialap ma Boru Simbolon jala tinggal ma ibana di luat i. Songoni do nang Datu Nabaratan ima anak paidua ni Sinabang, Dung mangali jala nunga magodang anakkon na tinubuhon ni Boru Pasaribu laho ma ibana marhutasada manandakon hadatuon tu Passur Napitu, Sait Nihuta, Aek Godang, Sidempuan, Garoga, dohot Parit Sabungan.



-14-
Parmahan do Raja Bungabunga, ala sian parmahan na di Huta Lahi do Raja Bungabunga diboan utusan ni tuan sihubil tu tu Balinge gabe dibahen ma gelar na Raja Parmahan Silalahi. Mansai bahat do horbo ni Raja Bungabunga, ndang habilangan godangna, sadia nasiat di sibudiala dohot nahumaliangna songoni ma godang ni horbo ni Raja Bungabunga ujui. Tingki Raja bungabunga marmahan horbo na di dolok i mauas situtu ma ibana ai so adong aek hape di hos niari tung mansai mohop do di dolok. Hundul ma Raja Bungabunga diatas ni batu, di igot ibana ma mual ni ompuna Raja Silahisabungan na di Huta Lahi, dibege ibana ma soara ni Raja Silahisabungan mandok tonggohon hohos mi dung I libashon ma. Ditonggohon Raja Bungabunga ma tu Mulajadi Nabolan hohos na ni lehon ni Raja silahisabungan tu ibana, dung i dilibashon ibana ma
hohos i, anggo dirohana naeng libashononna do hohos i tu tano do asa unang sega hohos i, hape hohos na ni libashon nai dang hona tu tano alai hona tu batu na nihundulanna, pintor haruar ma aek sian batu i jala i ma mual na adong di sibudiala, i ma mual ni Raja Bungabunga nasora marsik sahat tu saonari. Sian mual I ma Raja Bungabunga minum dohot martapian jala ditoruan ni mual i ma pargulu-guluan ni horbona.



-15-
Naujui adong do bukku laklak ni Raja Bungabunga, tingki martonggo Raja Bungabunga di bona ni hau, sian naso pamotoan na bukka ma laklak ni hau pangunsandean na i, dibuat ibana laklak hi hau i hape nunga marisi surat-surat hapistaran, habisukon dahot hasaktion.
Adong do tintin ni Raja Bungabunga, tintin na i marmata, tintin na ido dipangke mangubati na marsahit, molo dibereng ibana tintin na I boi do diboto ibana aha na masa, aha nanaeng di ulahaon halak na jahat, molo Ibana manungkun huhut mamereng tintin na i pittor mabiar jala mangangku do nasa parjahat.
Tungkot panaluan ni Raja Bungabunga boi disuru mardalan sandiri. Molo udan naso hasaongan alogo naso hapudian boi do disuru tungkot na i laho mamotuk angka na jahat.
Molo hujur ni Raja Bungabunga sai disimpan do dibilut na, dang diboan hujur na i anggo so apala naporlu situtu, piso dohot tintin na do jotjot diboan molo lao Raja Bungabunga marhuta sada. Adong do hodana na bontar dahot nabirong alai hoda na bontar do na jotjot dipangke Raja Bungabunga. Atik pe nasakti jala si godang ugasan Raja Bungabunga,ndang di pangasahon ibana hasaktion dohot ugasan na i, habisukon dahot hapistaran na do dipatujolo pataluhon nasa alona.



-16-


OMPUNG MULAJADI NA BOLON
NA HANSIT MA DA AHU ON
NA SO MARTUDOSAN MA AHU
AI NUNGGA DI TANGKO NADEBA AHU



MASA MA DI BALIGE ARI LOGO UJU I
ALA NUNGGA TUNG LELENG ARI LOGO I
DISUNGKUN TUAN SIHUBIL PARBINOTONA
HAPE NA ADONG DO DONGAN TUBUNA
NA BOI PARO UDAN DI HUTA LAHI
DISURU TUAN SIHUBIL MA MANGALAPI
ALAI SILAHISABUNGAN DANG MANGOLOI
OMPUNG MULAJADI NA BOLON

NA HANSIT MA DA AHU ON
NA SO MARTUDOSAN MA AHU
AI NUNGGA DI TANGKO NADEBA AHU
AHU NASO MARBINOTO AGIA AHA PE
DI BOAN DO AHU TU LUAT BALIGE
IMA LUAT HATUBUAN NI DA OMPUNG
ASA NA GABE AHU MA HAPE
NALAHO PANGGANTI NI DA OMPUNG
SILAHISABUNGAN NA MARSAHALA I
NABOI PARO UDAN DI BALIGE NAULI
OMPUNG MULAJADI NA BOLON
SAI PARBISUKI MA DA AHU ON
ASA SONGON OMPUNGHU RAJA I
NA TADING DI HUTA LAHI HATUBUANKI